Nåvti duv ulmusjdiedojt giehtadallap

Moarmesmáno 25.b. rájes la ådå dáhtásuodjebiejadus fámon, GDPR, gájkka EU:a rijkajn. Dáppe Svierigin målsut ulmusjdiehtolágav, PUL. Praktijkalattjat duv ulmusjdiedoj suodje nanniduvvá ja duv rievtesvuohta diedov oadtjot masi da aneduvvi ja gåktu giehtadaláduvvi mijás fábmudagán, valla aj ietjá organisasjåvnåjn ja vidnudagájn.

Lenastivrra márjju dárbaj tjoahkkit, duosstot jali ietjáláhkáj duv ulmusjdiedojt giehtadallat. Ulmusjdiehto l gájklágásj diededibme mij njuolgga jali målkij baktu máhttá tjanáduvvat viesso almatjij. Gájklágásj giehtadallam majt máhttá ulmusjdiedoj dahkat, bv. vuorkudit, tjuolldet, oabllot ja moattedit, la ulmusjdiedoj giehtadallam.

Jus dujna l ássje lenastivran, oassálastá válljimsiedilin, vuododusá stivran tjåhkkåha jali barga guovlon majt gähttjap de giehtadallap duv ulmusjdiedojt. Sämmi l fámon bv. jus dån maná konferänssaj majt ásadip jali jus dån oassálasstá filman jali gåvån mijá sosiálasj kanálajn, webbabielijn ja ienep.

Ulmusjdiedoj giehtadallamin galggá lágalasj vuodo gávnnut

Ulmusjdiedoj gájkka giehtadallamijn hähttuji lágalasj vuodo gávnnut. Lenastivrra l dåjmalasj moatten riektáguovlon, danen ij la máhttelis buojkodit lágalasj vuodov juohkka sierra giehtadallamij dánna webbabielen. Jus ienep diedojt sidá makkir diedojt giehtadallap duv birra de aktavuodav válde ájggeguovddelis lenastivrajn jali midjij lenastivraj aktisasj dáhtásuodjeorganisasjåvnån, NOD.

Lenastivra li aktisattjat åvdåsvásstediddje

Gájkka 21 lenastivrajn rijkan la aktisasj IT-organisasjåvnnå ja moattet vuojnos ávkkip aj aktisasj vuogádagáv. Danen lenastivra li aktisattjat ulmusjdiehtoåvdåsvásstediddje ådå dáhtásuodjebiejadusá hárráj, GDPR. Lenastivra li aj aktisattjat ulmusjdiehtoåvdåsvásstediddje aktan ietjá fábmudagáj.

Láhkaásadibme rávkká struktuvrav ja gálggá tjielgas årrot registardume ulmutjij gåktu åvdåsvásstádus la juogedum lenastivraj ja ietjá fábmudagáj gaskan. Dat javllá gänna l åvdåsvásstádus duv ulmusjdiedo giehtadalli lágalattjat, njuolgga ja duolla.

Lenastivraj dáhtásuodjeoahttse

Danen gå Lenastivrajn li sämmilágásj dahkamusá de fábmudagá li válljim adnet aktisasj organisasjåvnåv (mij gåhtjoduvvá NOD) dáhtásuodjáj ja GDPR:aj. Rávkalvis dáhtásuodjebiejadusán la fábmudahka galggá nammadit dáhtásuodjeoahtsev ja diededit dav Dáhtáinspeksjåvnnåj mij la gähttjofábmudahka.

Lenastivrajn li guokta dáhtásuodjeoahttse ja sijá doajmma l gähttjat dáhtásuodjebiejadusá tjuovvomav, bagádit ja suoddjit, viehkedit duv registardume ulmutjin ja guládallen årrot Dáhtáinspeksjåvnnåj.

Jus dujna li gatjálvisá jali vuojno gåktu lenastivrra giehtadallá duv ulmusjdiedojt de aktavuodav válde dáhtásuodjeoahttsujn e-påvståj

Juohkka Lenastivrra l ulmusjåvdåsvásstediddje ietjas sierra dåjmas.

Dajna gå Lenastivra galggi máhttet ietjasa dievnastusájt fállat ja ållidit ietjasa välggogisvuodajt dunji de dárbahip duv ulmusjdiedojt giehtadallat. Duv ulmusjdiedoj ålles giehtadallamin suoddjip duv persåvnålasj identitehtav.

Anodip val duv ulmusjdiedojt jus gávnnuji ulmme diedojt ájmon bisodit. Ulmusjdiedo ma giehtadaláduvvi Lenastivras gávnnuji ienemusát nåv gåhtjodum almulasj ássjetjállagijn. Mierredittjat jus almulasj ássjetjála galggá bisoduvvat jali tjuoldeduvvat de l dárbulasj diedov árvustallat. Dán árvustallamin vieleduvvá:

  • diedo ájnasvuodav doajmmaj
  • álmmuga riektá oahpásmuvvamij
  • diedo guhkaájggásasj ájnasvuohta boahtteájge åtsådallamij

Vuodo biejadusá bisodime ja tjuolldema birra gávnnuji 2. kap. 18. § Prienntimfriddjavuottabiejadusán ja vuorkkálágan. Lenastivrra l vil välggogis anodit ulmusjdiedojt rávkalvisá milta umasslágásj riektábiejadusájs nåv gåk buojkulvissan vuododusláhka ja biedniktjáledimláhka.

Duv ulmusjdiedo li val ålediddje ulmutjijda gudi dajt dárbahi dåjmadittjat ietjasa dahkamusájt. Almulasj prinsihpa milta, mij gávnnu Svieriga vuodolágajs avtan, álmmugin la riektá diedojt oadtjot almulasj ássjetjállagijs ma älla sekretässas duodastuvvam. Danen gå duv ulmusjdiedo máhtti gávnnut almulasj ássjetjállagijn de mierkki ietjá ulmutjijn ja mediavidnudagájn jali márnánahttemvidnudagájn la riektá dájt ássjetjállagijt vuojnnet jus sijá ulme älla dáhtásuodjeláhkaásadime vuosstáj jali ietjáláhkáj li sekretässajn duodastuvvam almulasjvuohta- ja sekretässalágan.

Lenastivrra máhttá vil dárbahit vaddet dárbulasj diedojt fábmudagájda nåv gåk polijssa, värrodåjmadahka jali ietjá fábmudagá jus lip välggogisá dav dahkat lága milta

Lenastivrra agev viggá giehtadallat duv ulmusjdiedojt EU/EES:an (Europeiska Unionen/Europeiska Ekonomiska Samarbetsområdet). Diedo máhtti huoman sierra vidjurijn sirdeduvvat, ja giehtadaláduvvat, rijkajn EU/EES:a ålggolin danen gå mijá leveranserajs muhtema jali vuolepleveránssaera li rijkajgasskasasj organisasjåvnå nåv gåk buojkulvissan Microsoft ja Google.

Juohkka aktugasj äjggu ietjas ulmusjdiedojt. Danen la dujna aktugattjan sierra riektá majt Lenastivrra l välggogis váraj biedjat sierra vidjurijn. Dáhtásuodjeláhkaásadime milta dujna li riektá vuollelin majda máhtá vuosedit. Vuosedittjat duv riektájda de máhtá aktavuodav válldet dáhtásuodjeoahttsujn.


Dáhtásuodjebiejadusá milta dujna l agev riektá diededimev oadtjot makkir ulmusjdiedojt Lenastivrra l registaradám duv birra. Jus rája gatjálvisáv sválldasijn dataskyddsombudet@lansstyrelsen.se de dunji rádjap registaroasev. Oasse sisanet ulmusjdiedojt majt giehtadallap duv birra ja tevstav mij buojkot gåktu mij giehtadallap ulmusjdiedojt. Ienemusát mánov vuordá åvddål gå dakkir registaroasse dunji rájaduvvá.

Jus aná nágin ulmusjdiehto duv birra l boasstot jali vierre, de máhta rávkkat dat duolliduvvá jali sierra bále aneduvvá binnedum vuogijn. Aktavuodav dalloj válde dáhtásuodjeoahttsujn ja tjielggi majt aná l boasstot ja manen.

Dujna ij la riektá oadtjot ietjat ulmusjdiedojt ierit sihkodum jus Lenastivrra buojkulvissan:

Dárbaj giehtadallat ulmusjdiedojt dåjmadittjat dahkamusáv almulasj ájnasvuodas, lihttoaktavuoda rájáj gaskan dujna, oasse ietjas fábmudakdåjmadusán, vuorkkáulmmáj, dåjmadittjat riektáv moalggem- ja diededimfriddjavuohtaj, ållidittjat riektálasj välggogisvuodav jali bälostit riektálasj rávkalvisájt.

Dujna l riektá ádnot ierit sihkkomav duv ulmusjdiedojs ma vuorkkiduvvi Lenastivras jus binnemusát akta tjuovvo vidjurijs la dievdedum:

  • diedo e des dárbahuvá tjoahkkidum ulmijda
  • giehtadallam vuododuvvá miededibmáj ja dån ruoptoválda ietjat miededimev
  • giehtadallam dagáduvvá njuolggamárnánahttemij ja dån vuosstálasstá diedo giehtadaláduvvi dan ulmmáj
  • dån vuosstálastá ulmusjdiehtogiehtadallamij mij dagáduvvá fábmudakdåjmadusá rájáj sinna jali ájnasvuohta viejedime maŋŋela ja e gávnnu riektálasj oare ma li ájnnasappo gå duv ájnasvuohta
  • ulmusjdiedo li giehtadaládum lágadis
  • ierit sihkkom rávkaduvvá ållidittjat riektálasj välggogisvuodav ulmusjdiedo li tjoahkkidum diehtosebrudagá dievnastusáj fálaldagáj aktavuodan (e-dievnastusá, sosiálalasj media).

Dujna l muhttijn riektá ietjat ulmusjdiedojt oadtjot almulasj, hábbmidum ja masjijnalågådahtes formáhtan ja vil oadtjot ietjat ulmusjdiedojt sirdedum ietjá organisasjåvnnåj (jus la máhttelis teknijkalattjat) jus giehtadallam vuododuvvá miededibmáj jali lihttuj ja dagáduvvá automáhtalattjat (IT-nävoj). Rievtesvuohta ij la anodahkes jus fábmudagáj giehtadallam la dárbulasj dåjmadittjat dahkamusáv almulasj ájnasvuodas jali l oasse fábmudakdåjmadusán. Aktavuodav válde mijá dáhtásuodjeoahttsujn jus sidá ienebuv diehtet.

Dujna l riektá vuosstálasstet gåktu Lenastivrra duv ulmusjdiedojt giehtadallá ja gujddimusájt vaddet dáhtásuodjefábmudahkaj. Máhtá akta goassa vuosstálasstet njuolggamárnánahttemij ja de Lenastivrra hiejtet márnánahttemis. Vuosstálasstem ij gis máhte bájnatjit almulasjvuohtáprinsihpav ja ietjá oassebiele máhtti vil adnet duv diedojt márnánahttemij.

Aktavuodav válde lenastivraj dáhtásuodjeoahtsev

E-påvsstå: dataskyddsombudet@lansstyrelsen.se

Telefåvnnå: 010-223 10 00 (Telefåvnnåguovdásj Lenastivrra Stockholm)

Kontakt

Dela sidan:

Landshövding

Lena Rådström Baastad

Besöksadress

Stortorget 22

Postadress

701 86 Örebro

Organisationsnummer

202100-2403

Följ oss